O grupo EPhysLab do Centro de Investigación Mariña (CIM) da Universidade de Vigo coordina o proxecto estatal Aurora, centrado en mellorar a resiliencia, o deseño e a optimización das estruturas de protección costeira. O seu obxectivo principal é desenvolver, validar e aplicar ferramentas de modelado numérico de última xeración para abordar a estabilidade das unidades de blindaxe dos crebaondas (elementos clave para garantir a estabilidade destas infraestruturas ante condicións marítimas cada vez máis extremas) ao tempo que se afonda na comprensión dos procesos físicos que desencadean a súa inestabilidade.
O proxecto realízase de xeito coordinado coa Universitat Politècnica de Catalunya (UPC). Conta cun orzamento total de 369.375 euros financiados pola convocatoria a Proxectos de Xeración de Coñecemento 2024, da Agencia Estatal de Investigación do Ministerio de Ciencia, Innovación y Universidades. Arrancou en setembro de 2025 e prolongarase ata agosto de 2028. A iniciativa ten unha destacada dimensión internacional, contando coa participación e colaboración de persoal investigador de institucións como a Universitat Politècnica de València, a Universidade do Porto, KU Leuven, Uppsala University e a empresa xaponesa Fudo Tetra Corporation. “Esta rede de colaboración reforza a capacidade do proxecto para integrar coñecemento punteiro en modelización, experimentación e aplicación práctica na enxeñaría marítima”, sinalan desde a organización.