O proxecto Bevegal, desenvolvido desde o grupo Food and Health Omics da Universidade de Vigo, avanza no desenvolvemento de bebidas vexetais empregando produtos de orixe galega, concretamente a partir de castaña e faba de Lourenzá. Nel traballouse na definición dun procedemento de elaboración asistida por ultrasóns, tecnoloxicamente viable e ambientalmente sostible, e na avaliación físico-química e nutricional das formulacións elaboradas.
O traballo é unha das iniciativas beneficiarias da convocatoria a proxectos do persoal investigador na etapa de formación posdoutoral do campus de Ourense (Inou+PosDou Campus Auga 2025), financiada ao abeiro do convenio de colaboración entre a Consellería de Educación, Ciencia, Universidades e Formación Profesional e a Universidade de Vigo para o desenvolvemento de accións estratéxicas no Campus Auga (2024-2027). Jorge A. Custodio, investigador Juan de la Cierva do grupo Food and Health Omics, que ten a súa sede na Facultade de Ciencias do campus de Ourense, é o responsable do proxecto.
Segundo explica o investigador, as bebidas vexetais consolidáronse como unha categoría emerxente de crecente relevancia no mercado español e internacional, impulsada por cambios de hábitos e pola demanda de alternativas de orixe vexetal. Neste contexto, o equipo da UVigo traballou en Bevegal arredor do desenvolvemento de bebidas vexetais non fermentadas elaboradas con materias primas con indicación xeográfica protexida, como a castaña de Galicia e a faba de Lourenzá, combinando optimización tecnolóxica con ultrasóns e caracterización química e nutricional avanzada, baixo un enfoque circular e sostible. “Queríamos explorar o potencial de materias primas galegas para elaborar bebidas vexetais e obter unha caracterización completa que permita orientar melloras futuras no produto”, sinala Jorge A. Custodio Mendoza.